Diet Fitness

無甜不歡?食太甜會誘發嘅8種病!甜品控小心會糖上癮換嚟周身病痛~

24/07/2018

身邊有唔少女性朋友嚟M、心情差,都話想食甜品減減壓。無錯,食甜可以平伏情緒,幫身體叉叉電。但你唔知唔食得太多甜嘢,除咗換嚟一棚爛牙之外,仲會為健康帶嚟一發不可收拾嘅壞處。無論你喺食極唔肥,定喺比人激嬲,要放肆一下食甜嘢降溫都好,都要識得適可而止啊~


「無甜不歡」要小心!

1. 血糖升高

即使喺比較健康嘅糖,例如蜜糖,食太多都會令血糖快速上升。基本上所有甜食都有大量蔗糖、葡萄糖,加上甜食嘅糖分屬於單糖,好快畀人體吸收,習慣食個飯後甜品作為生活態度嘅人要小心喇~

 

2. 血脂升高

狂食甜品唔識節制,血液入面嘅膽固醇、三酸甘油酯都會隨之增加,因而有機會患上心臟血管疾病。

 

3. 痛風搵上門

以為痛風得老人家先有?其實已經證實咗痛風有年輕化趨勢,而糖分就喺元兇!唔多唔少都關飲食文化變化有關,見到買杯黑糖珍珠奶茶都要排一個鐘就知啦~平時早餐咖啡慣咗多奶多糖、中午珍珠奶茶當半餐、紙包飲品當水飲……呢啲都會令你尿酸過高,因而引發痛風。唔想周身痛成個啊婆咁,就唔好「無甜不歡」喇~

 

4. 爛牙、口腔潰瘍

喺人都知食太甜會蛀牙,仲分分鐘因為細菌大量繁殖令你有口腔潰瘍。到時食唔安、瞓唔落、仲要一開口講嘢已經臭死人,男神都比你嚇走埋。

 

5. 食極唔飽變痴肥

有女人會甜品當正餐,食完充滿罪惡感,於是諗住唔食其他嘢就可以「拉上補下」,無咁易因為食太多變肥。其實咁做會令身體單單攝取熱量,而攝取唔到營養,當身體唔夠營養,自然好快有食慾。忍得一次忍唔到第二次,好快就變成「大胃王」,胃口變大仲肥咗一圈。

 

6. 骨質疏鬆

糖喺體內嘅代謝需要消耗維他命同礦物質,所以「無甜不歡」會間接令你缺乏維他命、鈣、鉀等營養。有研究已經發現,食太多甜嘢會令小朋友容易骨折。成年人食太甜,都會增加患上骨質疏鬆症風險。

 

7. 殘得快

由於糖分會同皮膚入面嘅膠原蛋白結合,令膠原蛋白失去對皮膚嘅修復同再生能力,虎紋、鬆弛就喺咁而嚟。想做美魔女,望落比真實年齡細?唔好急住買過千蚊嘅抗衰老產品,第一樣可以做又有實際效益嘅就喺戒甜啦。數口精明嘅你,識得計啦~

 

8. 女人病搵上門

鍾意食甜嘅人皮膚望落無咁好,易生暗瘡之餘,仲有機會因為陰道內菌群失調而患上陰道炎,唔想有女人之苦就唔好食太甜喇~

 

對於一眾「甜品就喺人生樂趣」嘅女士嚟講,要突然完全「走甜」真喺好難。大家可以先從日常飲食入手,令自己口味慢慢變淡,比如喺每餐戒走有糖分嘅飲品,改飲熱檸水,無糖茶之類,戒糖過程先唔會容易半途而廢呢~

 

Text:POP-OL Editorial

Photo source:Pinterest