Beauty

腦部曾經疑似有血瘤,手術前媽媽過世~海蘭察王冠逸一路堅強,終靠《延禧攻略》彈起!

24/08/2018

《延禧攻略》熱潮席捲全城,備受關注嘅人物除咗「皇后」秦嵐之外,其實男子組都好養眼嫁,就好似「乾隆」聶遠,同埋「富察傅恒」許凱,都不斷被討論,就連演御前侍衛「海蘭察」嘅王冠逸都因為呢套劇而人氣急升~呢位新加坡型男靚仔、演得唱得,身材又好,不過佢過往原來曾經有一段悲痛嘅經歷,幸好佢堅持下去,我地先今日先可以見到佢嘅演出,真係要比個讚呀!

30歲王冠逸身高1.78米,靚仔得嚟身形均稱,平日時喺社交平台上都會晒下健身片、肌肉相冧下Fans~

而喺《延禧攻略》入面王冠逸於同「明玉」姜梓就係鬥氣冤家,仲被封為「大嘴猴CP」。有唔少觀眾都好鐘意佢傻更更又搞笑嘅場面~

但唔講唔知原來佢本人完全無諗過只係負責搞笑都可以吸引到大家,佢仲自爆自己喺角色加入咗個人風格,竟然意外地獲得編劇私訊大讚!

王冠逸19歲嘅時候就喺日本準備用男團成員身份出道,不過有傳因為公司要力捧另一位女歌手,最後佢嘅事就無疾而終。

當時佢都捱過一段艱辛嘅日子,仲因為經理人出錯而要喺電視台下跪道歉,以免電視台封殺公司全部藝人,捱咗兩年之後終於離開當地,去到新加坡、德國、泰國同埋香港等地拍劇拍戲、旅遊節目,成為一個精通英、日、粵、普通話等多國語言嘅實力派藝人~

王冠逸於2016年轉到內地發展,仲被「富察皇后」秦嵐主理嘅經理人公司簽咗,佢曾透露點解會鐘意王冠逸,就係因為佢夠真:「他不說場面話,直接說他很想紅,想賺多點錢養家!」之後王冠逸工作不斷。

二人多次合作同埋一齊上節目,仲曾經傳出過緋聞,今年5月佢同秦嵐獲品牌邀請現身康城紅地氈,王冠逸更於社交網留言立志:「我下個目標就是帶我的作品到康城!」

不過唔好睇王冠逸喺劇中好似好樂觀、無憂無慮咁~其實佢曾經經歷過生關死劫,佢透露2016年係自己人生最難忘嘅一年,當時被發現腦部有類似血瘤,本來想去北京做手術,點知媽媽就過世,大受打擊下令佢突然暴瘦,當時仲為媽媽食素,等到過後完成手術先再番到北京發展。 今時今日王冠逸靠《延禧攻略》彈起,都係多得佢當時有努力捱過重重難關,先可以走到宜家呢一步,希望佢日後可以拍更多好戲,達成佢「我下個目標就是帶我的作品到康城!」嘅目標啦~

Text:POP-Editorial

Photo Source: