Celebrity Life Love Relationship

29+1的女生都有著各樣生命和愛情的煩惱,會開始擔心變老、

24/09/2018

鍾麗淇(Margaret)的29+1,都係充滿住挑戰嘅一個階段,當時佢決斷退出娛樂圈,跟隨自己內心嘅聲音,轉行做瑜伽教練。同時亦和拍拖多年嘅關係斬纜,重回一個人嘅生活。「30歲那年,我覺得我會自己一個人老。」睇住今年39+2(41歲),唔單只搵到美滿婚姻,仲有兩個可愛嘅囡,回想當初放手一試,讓瑜伽成為佢生命中不可或缺嘅部份。

鍾麗淇話廿幾歲時,完全唔識保養,走過29+1先學識要多照顧自己。仲話:「很多人說瑜伽是信仰,其實它更像是哲學。」

對好多人嚟講,娛樂圈係一個花花世界,有幾高就會渴望爬得幾高。鍾麗淇因參選多倫多華裔小姐而入行,形象甜美正面,嚟港發展一劇接一劇,有《刑事偵緝檔案III》、《鑑證實錄》,發展漸趨穩定嘅時候,佢卻毅然選擇放低近10年所建立嘅演藝事業,喺29+1嘅時候,轉行做瑜伽導師。

「我開始很認真(做瑜伽),是我們到非洲拍攝《天涯俠醫》,譬如中間有空檔時間,我會播影片讓自己做瑜伽,我的室友(陳敏之)覺得我不去休息,很傻!但當我動動身體時,我會有種很舒服的感覺。」果段時間,佢岩岩好和TVB約滿,亦知道自己嘅心早已喺瑜珈。因而毅然放低演藝工作,為人生另闢一條路。

「我知道可能會搵少了很多錢,不過我很開心。」

Margaret經歷兩段長愛情關係後,佢將自己封閉起嚟、唔願接觸新事物,即使身邊有唔少追求者,佢都唔願打開心房:「那時30歲,我覺得自己會一個人老!因為那時,剛與前男朋友分開一段時間,即使有人追求,我永遠都會有藉口告訴自己那個人的缺點,而令自己不去跟進呢個男仔,可能他的手太女性化,又或者是其他奇怪、不重要的原因。」

30歲嘅女生,總係愛將「我老了」掛係口邊,從前嘅鍾麗淇亦唔例外:「的確,我那時會在想30歲真的很老。其實我不特別喜歡出去玩,我寧願在房內做瑜珈。」好姊妹見狀,覺得唔對勁,都紛紛拉佢出去見見人、飲飲酒。就咁無心插柳嘅情況下,佢遇到一生中嘅最愛。

亦因為種種經歷,令佢放下執著,唔似從前一樣跟住planning而行:「第一段戀愛,我會覺得我25歲會結婚;第二段戀愛,就應該是會結婚,心中會有計劃;到第三段(丈夫Nardone Ruggero),那時卻沒想過結婚的問題,但我好肯定我現在的關係是永遠的。」

「之前的兩段關係,你會覺得其實永遠都會有個感覺是:我愛他,他是好的,不過當中好像有點不對勁,你間中會有感覺知道不是(他),但很多時都按住這回事,因為對方都頗為不錯。只有你嘗試過、你感受過,其實你會知道究竟那個人是否適合你。」

「如果我沒有做過平時不喜歡做的事情。『嘩!有狗仔啊在中環,我不會外出;你叫我去喝酒,我未必去喝』如果我跟隨平時保護自己的思想去行,我不會認識到我的丈夫。」

直到今日,佢哋已經維持咗長達12年嘅愛。

走過29+1,而加係39+2嘅Margaret,和我哋一樣,30歲時會認為自己真係好老,但佢卻從無後悔過佢嘅隨心而行:「我20歲到今時今日,我有跟自己說:『就算,我明天不在(這世上),我也沒有後悔過任何事情,是真的。』,要相信一個人的心,腦袋可以問問題,不過如果你個心都在吶喊:得㗎!那麼你便去實行,因為你跟隨個心去做事情,會比跟隨腦袋做事情帶來更少後悔。」

「如果你覺得自己不值得,如果你不愛錫自己,你好難以接受到別人喜歡你或愛你,就算他說『我愛你』,你也未必會相信他。」

其實30歲並唔可怕,可怕嘅係我哋故步自封!

 

Text:POP-OL Editorial

Photo Source:Instagram