Celebrity Life Love Relationship

又錫老婆、又愛小孩,陳豪絕對是滿分爸爸,哄得愛妻陳茵媺心花怒放,狂晒恩愛!

03/10/2018

戀愛咗兩年半,陳豪和陳茵媺喺2013年共諧連理,更以三年抱三嘅節奏誕下兩仔一女,組成咗一個幸福嘅五口子家庭。近日佢哋更搬咗去南區豪宅,家裡開支咁大,身為一家之主嘅陳豪,要密密搵多啲自然就少咗時間陪伴愛妻愛兒。不過佢哋兩公婆出曬名係恩愛夫妻,所以就算最近忙拍新劇嘅陳豪,再忙都會抽幾個鐘同老婆茵媺拍吓拖,哄得茵媺心花怒放,頻頻喺ig晒恩愛~

身兼愛妻號老公、好好爸爸

今年係佢哋結婚5周年,要背起一個五口子之家,陳豪真係忙到無時停,之前暑假都冇時間陪老婆仔女,而茵媺只好一個人帶住3個細路返加拿大過暑假!

不過陳豪都好積極爭取時間做個好老公和好爸爸,好似果日茵媺和仔女返嚟香港,佢不但親自去接機,仲要逐個啜番啖,睇佢咁肉緊,就知佢幾咁掛住老婆仔女啦~

 

謝安琪笑甜到有糖尿

其實茵媺都一樣成日掛住個老公㗎~好似上星期茵媺喺 ig 就上載咗張同老公抱抱嘅相,話老公最近因為忙於拍劇,好耐冇同佢二人世界拍吓拖,所以好感激老公有幾個鐘都留嚟陪自己!

公然咁晒恩愛,都已經夠閃,如果有仔細睇,會留意到茵媺放喺陳豪胸膛上嗰隻手,上面嗰粒巨鑽,就更加閃到令人眼都盲!最搞笑嘅係,連阿Kay謝安琪都睇唔過眼,話佢哋兩公婆甜到搞到佢有「急性糖尿病」添!

 

愛你閃不完

前幾日陳豪又要出埠拍劇,行開冇耐,茵媺就已經忍唔住流露出對老公嘅依依不捨,仲話掛住老公,最好就係碌手機睇相喇!

呢張係陳豪和一對仔女嘅合照,茵媺就最鐘意啦!因為相裡幾個笑容已代表一切!最後Sweet爆咁講咗句:「I love you baby!」,講完仲要Tag埋老公個名!真係甜到漏~

 

Text:POP-OLEditorial

Photo Source:Instagram