Lifestyle Love Relationship

貓奴還是狗奴?養寵物反映主人性格!愛貓神經質、愛狗較傳統!

04/10/2018

貓同狗本身就係性格大相徑庭嘅動物,狗狗對住你「搖頭又尾擺」,相反貓貓見到你放工番屋企,佢走都走唔切…當然,兩者都有討人喜歡之處,唔好以為鍾意咩寵物單純係個人喜好,其實比較愛貓抑或比較愛狗正正反映人嘅個性。心儀對象係貓奴定狗奴?從呢個方向了解佢更多吧!

smallc_jo @ ig

美國德克薩斯州大學奧斯汀分校調查咗4,565個受訪者,根據佢哋養寵物選擇繼而評估佢哋嘅個性。結果發現養貓與養狗嘅人性格大不同。

becca_sp_ @ ig

【狗奴】外向、愛包容、責任心強

研究指出,養狗人比較外向,比養貓人嘅「外向指算」高出15%,善解人意程度亦高出13%。另外,養狗人嘅性格外向、活潑,性格亦無咁神經質。

dogs.lovers @ ig

原因可以追溯狗狗嘅生活習性,相比於養貓,養狗嘅時間付出相對較多,比如養狗者經常要帶寵物去街,要陪狗狗玩,投放好多注意力喺佢哋身上,又因為經常外出放狗,有更多機會認識新嘅朋友。

nieh09 @ ig

因此可以推斷狗奴為人更有包容心、願意為關係付出。研究更指出,養狗人比養貓人責任心高出11%,男人有責任心真係一個必要嘅擇偶條件,唔想搵「媽寶」做伴侶,不妨多認識身邊喜歡狗狗嘅男仔,佢哋不但比較熱情多嘢講,跟佢哋相處永遠唔怕悶,更係一個自律、對未來有規劃,對自己有目標嘅人呢!

dogs.lovers @ ig

【貓奴】內向、智慧高、神經質

研究指出,愛貓人比較神經質,「神經質指數」更高出12%。所謂「物似主人形」,喜歡貓貓嘅人,都比較有好奇心、成日有古靈精怪嘅諗法,冒險、情感需求較大;而且,相比喜歡狗狗嘅人,貓奴思想更易接受一切非傳統嘅事物,因為佢哋本身已經有非傳統嘅觀念!

eleven_wang111 @ ig

喜歡男生獨立嘅你就要留意喇~研究發現養貓人更內向、冷靜,為人亦好似貓貓,唔需要成日陪伴,因為佢哋性格非常獨立!有趣嘅係,貓貓性格一向係獨來獨往,又高竇,作為貓奴嘅反而十足十個奴才,所以都可以推斷愛貓男性格有如「奴才」一樣—唔執著、侵略性低,仲會怕羞膽小!

cats_of_instagram @ ig

不過,小編始終都係相信人係有多重性格,就算喜歡貓定係喜歡狗,都唔一定擁有上述所有性格。如果你覺得跟男神仍然有段距離,想窺探一吓佢嘅性格嘅話,以上研究就當作多一個參考吧!

Text:POP-OL Editorial

Photo Source:Instagram