Celebrity

甘心做配角27年,300磅鐵漢卻擁有柔情內心~自強不息金牌綠葉林雪:做演員永遠無下一班車。

10/10/2018

有一種表演者,觀眾成日係電影或者係電視上見到佢,但總係講唔出佢叫咩名;另一種表演者,演技深入人心,做過嘅角色家傳戶曉,但觀眾反而講唔出電影戲名—呢一類表演者,佢哋係萬年綠葉、金牌配角,好少見佢擔大旗做主角,但佢就係擁有無可取替嘅魅力,而呢種光彩,係萬年綠葉上總係顯得特別燦爛。林雪,就係呢個表演台上一片小小嘅綠葉,喺港片式微嘅今日,演出過嘅電影,有質亦有量,可謂港產片新一代嘅配角之王。

from Weibo

年紀輕輕 場務出道

電影中嘅林雪,精湛演技配上一口鄉音,將唔同角色都演得出神入化,同時充滿喜感,往往都令觀眾留下深刻印象。林雪操一口「唔咸唔淡」嘅廣東話,細個一直喺天津生活嘅佢,15歲跟隨屋企人嚟到香港生活。70年代嘅香港雖然無宜家咁繁榮,但總算係萬家燈火;相反,林雪細個生活嘅地方仍然係鄉下地方,周圍都係平房,人們出入都係騎單車,推木頭車。

from Sina

移居後,年紀輕輕嘅林雪當然有一刻為眼前美好嘅繁華夜景興奮過,但好快就打破咗佢嘅美夢—現實生活充斥住壓力,林雪一家人住嘅地方係貧民窟,又被稱為三不管地帶(中國政府不管、英國政府不管、香港政府不管),無水無電、環境惡劣。

from Weibo

林雪為咗維持生計,放棄讀書,做一啲粗重工作。風漾年華嘅青春歲月,佢已經跑去做苦力。16歲𠴱年,佢喺油麻地果欄做搬運,每日凌晨兩點番工,朝早10點收工。由於廣東話講得唔好,畀人叫「上海仔」,人哋推30斤貨,大隻健碩嘅林雪可以推80,90斤。出賣勞力嘅工作最重要係唔怕蝕底,一樣有人會讚賞你,但做錯嘢換嚟嘅就係「一巴掌」。

from Weibo

年輕時喺街頭混日子,難免係無所事事、惹是生非,因為係街頭打交,間接認識咗一啲出名嘅武師,比如係林正英同洪金寶,都間接帶咗佢入「電影工作」。林雪回想自己第一次接觸「電影工作」,其實就係做唔起眼嘅場務,年紀輕輕嘅佢覺得拍電影好新鮮:有明星睇、有飯盒食、又有人工收,慢慢對電影產生興趣。

from Sina

燈光、劇務、製片、攝影……呢啲同演戲仲有一段好遠距離嘅工作,林雪都做過好多年。趺趺碰碰嘅路途上,或者佢都佢無諗過自己有一日會成為大銀幕上嘅演員,偏偏一副「打不死」心態,肯博肯捱,甚至試過不收分文,只係要求要兩個填飽肚子嘅飯盒,問導演畀自己參與演出,即使係零對白,只係一個肥仔經過鏡頭嘅晝面,佢都願意做。終於黃天不負有心人,開始有導演肯比機會佢。

from Sina

from Sina

願意畀機會佢嘅伯樂,就係曾經合作無間嘅導演杜琪峰。杜琪峰跟林雪講:「拍《槍火》,你就是演員。」呢句說話鼓勵咗林雪,喺《槍火》嘅演出,林雪內斂細緻嘅演技被提名台灣金馬獎最佳男配角,雖然最終無獲獎,但已經贏盡圈內人口碑,從此「林雪」呢個名,就變得廣為人知。即使係電影市道低迷,好多演員都無戲拍嘅日子,林雪仍然每年參與10部以上嘅演出。上年就憑《樹大招風》獲得第十一屆亞洲電影大獎最佳男配角,大概就係對佢自強不息精神嘅回報。

From Weibo

雖然一直唔愁無戲拍,但無奈受形象所限,林雪頂多只係演配角,除咗認命,就只有默默耕耘。雖然係做綠葉,但佢都做足100分,林雪笑言:「我每次擺自己個位都唔係綠葉嘛,當正係主角,咁嗰場戲焦點真係喺我度,係咁投入去做會發揮得更好。」

from Weibo

林雪有一副「三餐唔憂」嘅身型,佢自己反而感恩電影為佢帶嚟嘅豐足,除了係生活上嘅改變,更多嘅係事業上嘅成就感:「我三餐係無要求,求其放入口填飽肚,對生活要求好低,但對電影工作就希望可以更上一層樓,每日都想有進步空間。」

from Sina

肥係林雪麻甩嘅鐵漢外表,那麼柔情就係佢內在嘅溫柔。林雪曾經喺訪問中表示,自己最希望拍一套「偉大嘅愛情文藝片」,唔了解佢嘅人可能對呢個鐵漢子大跌眼鏡,但事實上,林雪本人從來都唔似佢喺警匪片入面咁霸道同麻甩。「柔情似水」嘅佢生活閒時喜歡插花,仲上過插花班。呢種搞笑嘅「違和感」,令小編都不禁諗:林肥只是佢嘅花名,並唔係佢嘅內在。

from Weibo

Text: POP-OL Editorial

Photo source: Weibo, Sina